Página — Comunicacion SECUNDARIA (pág. 36)

chayamunanta munaywan suyarqani. Sapa punchaw ripusqanmanhinam hayka punchawraq, hayka killaraq chayamunanpaq kachkan nispay tapukurqani.

Mana musyayllapim,sumaq kanchiriq punchawpi,ancha suyasqay kuski killa chayarqamurqan. Chay punchawkunaqa ayllukunapas sutillam qulla ichuta kuchurqamuspanku ichu waskata kawpunakupaq

simpanankupaq allichakurqakuña, ñuqapas allichasqañam hatun taytayta haku niwananta suyarqani. Intichaw punchaw achikyaytam,manaraq pichinkuchakuna waqachkaptin, kimsa pacha achikyayllata awichuy chaka rurananpaq llaqtakunapa qullanankuna hamurquspanku kamarqachirqanku. Chay pachallam allichakuspayku raspi raspillapiraq kuka piska, huñi yaku hinallataq qiswa waskata qipirisqa wasimanta luqsirqaniku.

Hatun taytayqa chiri chiri ñan purisqaykupim tukuy ima ruranayta mana ruranaytapas chayanaykukama umachawarqan. Tawa punchawpim chaka ruraytaqa yacharqachiwarqan. Chay punchawkunaqa manam musquypi mañakusqanmanhina haywarikuyta, llapallan ayllukuna minkapi chaka qispichinankuta yacharqanichu.Kaypiñam warmikuna, warmachakuna imarayku chaka awaypi mana churapakunankutapas yacharqurqani. Chaka awaypipas raku raku waskakuna imayna simpayta, imayna kallpasapa kananpaq watayta hinallataq imayna awaytapas yacharqurqanim.

Chaymanta pacham sapa wata chaka ruraypi kuskacharqani. Yaqa chunka pichqa watallam awichuyta chakakuna ruraypiqa yanaparqani.Unquyniymi chay ancha munasqaymanta rakirquwarqan. Kunanmi kutirqamuni ichaya Mama Pachapa Apupa munayninpi ruraymanraq.

Pachqi

Kay qillqasqaqa tiqsichana qillqasqapa ukunpim tarikun.Pacha imayna kasqantam, haykapi ima rurakusqantam pacha qatiqlla apakusqantam tiqsichaspa hina kaqllata riqsichikun.


34