Página — Comunicacion SECUNDARIA (pág. 39)

Kastilla simimanta tikraq: Juan Luis Espinoza Chinchón

Mana kikin Kinya llaqtapi kawsaq, tiyaq warmachakunaqa, yachaq wasinmanta luqsispankum yaku hurqunankupaq qati qatilla sayanku.

Wasinkuman manaraq kutichkaspankum yakutaraq aysanku. Yaku hurquna hatun qucham parqunapaq yarqawan laqasqa. Yarqam 7 km sayayniyuq.

Llapa Kinya ayllukunam yarqa ruraypi yanapakurqanku. Mana yakumanta sasachakuypi kanankupaqmi kicharqanku. Manaraq yaku kaptinqa warmikunam karu karumanta yakuta astamuspanku llumpayta sasachakuqku.

"World Vision'"huñupa yanapakuyninwanmi yarqata rurarqanku. Kinya suyu muyuriqnin allpapiqa manam yaku kanchu. Puraminti chaki allpam.Kayraykum mana ima ruranankupaqpas allinchu. Chaymi yarqapa kinrayninkunapi uchkukunata rurarqanku.

Yaku quchaptinñataqmi llapa warmachakuna upyanankupaq yakuta hurquqku. Kayna kawsaspankum lliw warmachakunata yaku mana usuchinankupaq yachachirqaku. Yakutaqa kuyakuywanmi qawaqku.

"World Vision”sutiyuq huñum llaqtaman kaynata rimapayan:"Chakiyaytam pisichisaqku. Manam chakiyayqa miranqachu,chakiyayqa llapa runakunatam sasachakuyman churan", nispa.

Manataqmi chayllachu rurayqa. Tawa mayuta chakichispankum yarqataqa rurarqanku. Chaynaspankum karu karu chaki allpantakama yakuta pusarqanku. Runakuna upyanankupaqñataqmi uchkuchakunata ruraspanku yakuta quchachiqku.

Llamkay qallaykuptillanmi llapa runakuna yaku upyayta qallaykurqanku.Yakutaqa saksanankukamam upyarqanku, kaywanqa hawka kusisqañam runakuna kawsarqanku. Chaymi llapa warmachakunapas allintaña llamkayta qallaykurqanku.

37