Página — Comunicacion SECUNDARIA (pág. 35)

Illaku ayllupi ñan allichay

Qillqaq: Victor A. Talavera Yangali

Pichqa watamantam llaqtayman kutirqamuni. Kunan punchawmi chakata rurachkasqaku. Kay rurayta qawaspaymi maqtallaraq kasqayta yuyarirquni. Watan watanmi iskay hunka qallariy kuski killapi chakataqa rurana karqan. Chaka simpayqa warma kayniypi tukuy ima musquyniykunatam yuyayninpi waqaychan.Tutaraq punchawraq chiripiraq wayrapiraq kusisqaraq Karu karu chiri urqukunapa chawpinpim, Illaku sutiyuq kuyayllapaq sumaq llaqtacha tarikun, urqu

patanmanta qawaykusqaqa pikihina taksachallam rikukun. Kay llaqtachaman yaykuykunapaqqa Amaruhina qiwikachaq ñantam purina. Sapa watam,kawsaykuna huqariy pachapi, kawsaykunata apaykunankupaq, ñanninkuta allichanku. Kay watañataqmi taytachapa piñakuyninhina, tiksu rumi sayayta chikchi chayarqamun, chaymi mayu sayay manchakuypaq lluqlla rikurirquspa ñankunataqa wayqu wayquta saqirqun. Kayraykum llaqtapa umalliqninqa utqayman huñunakuyman llaqtataqa qayarqachin.

Huñunakuymanqa liwmi utqayman hamurqunku. Ichaqa tinintiñataqmi unqurquspa, wiksasapa, piña uya, rinhuniraq, suqu machu, Limamanta hamuq qatan runata sutinpi kacharqamusqa. Lliw runam wiryan wichiriq upahina runataqa qawarayarqunku. Wakinñataqmi rimapakunku chay iquyasqa umanpiqa manachá ima rurayninchikkunapa yachayninqa kanmanchu.Chaypim llaqtapa umalliqninqa utqayman ñan allichanankupaq minkapi llamkanankupaq allichakuyta qallarin. Chayllamanmi Limatukuq misti runaqa manchanaychi machayhina siminta kicharqamun, "manam minkapiqa llamkaswanchu nispan, chaynapi llamkaspaqa suyunchikpa qullanantam kuchitahina puquchichkanchik, paykunaqa suwa kuchihina hawkalla uyarayachkanku". Chaylapim kuraq suqusapa taytakucha rimarirqamun."Kay llaqtanchikqa taytachapa qunqasqa llaqtam, yaqa saqrapa wasin punkunpiñam kachkanchik, yanapakuy suyananchikkamaqa wañuypas apawasunñach. Nan allichayqa llaqtanchikpa allin kawsayninpaq rurayninmi, chaymi minkapi llamkananchik."Chayna niptinmi Limamanta runaqa suwa allquhina


33