Página — Comunicacion SECUNDARIA (pág. 16)

kutichin: - Mama Maryam, llamkaysinaypaq mañaykuwan chaymi payman aynikuq richkani. Kunan punchawqa santuyraqtaq, llullu papa yanuytachiki mikuykusaq, mama Maryaqa allin allintam chakran rurasqaqa mikuchikun.

Wartu rupaq yakuchaykita manuykuway, santuy kasqanta malliykusaq,ñuqapas paqarillanmi michka papayta allasaq, mama Maryam pallanqa,wakinta rantikurquspallaymi quykapusqayki. Mama Saraqa iskayastinsi uyaykun kaynata nistin: - Allinmi, qampas sapayki paypas sapan, sapapura kusatam ayninakunkichik. Tayta Antukuqa asinayastinsi nin:

• Yaw mama Sara, amañayá yanqakunata rimapayawaychu, machuñam kakuni. Mama Saraqa nin: - Kayllatam tayta Antuku qusqayki,macharquwaqñataq, mama Maryach imatapas niwanman.

Tukuyta rimastinsi wartu rupaq yaku upyayta tukurqun, chayllapis upyasqanqa umanman qispirqun. Machasqañas tanri tanrimantaña mama Maryapa wasin punkumanqa chayarqusqa. Chayna anchuykuchkaspallansi mama Maryapa wasin punkupi sayaqta, asnukuna karunasqaña watarayaqta rikurqusqa, chaymantañataqsi santun kasqanta yuyapakuspan kaynata rimapakusqa: - Santuy punchaw kasqantayá kay huknin asnupi sillakurqusaq. Huknin china asnumansi sillakurqun.

Mama Maryapa wasin punkunpas para pacha kasqanrayku quchallañas tarikusqa. Asnupi sillasqa kachkaptinsi mama Maryaqa wasinmanta luqsirqamuspan asnunpa kunkanman pawaykun kaynata qaqchastin:

• Yaw tayta Antuku asnuyankichu imaynam, asnuyqa chichum kakun,kamallatam qipitapas churkuni. Piñasqallañas asnutaqa kunkanmanta hapirquspan wayralla alliqman muyurparichisqa, hinaptinsi tayta Antukuqa quchaman umanpa wichikuykusqa. Yuyayninpas chinkanankamas umanta waqtakurqusqa. Musuq pachanpas llumpay mitullañas rikukusqa.

Unaymantañas yuyaynin kutirqamuptin mama Maryataqa piñasqallaña nin:—"paqarinmi qampaq qasa kanqa". Chayta nispansi wasinman kutikun.

14