Página — Lenguas Originarias PRIMARIA (pág. 32)

Anqarakunapa apunkuna

nqara suyupa apunkunaqa achkam kanku, kayqa achka ayllukuna kasqankuraykum sapakamam maypi tarikusqankupi waqaychaqninkunawan riqsichikunku, paykunawan rimanakuspa kawsanku. Kanmi kuraq apukuna, sullka patma apukuna kantaq, hinaspaqa ayllu apukunapas Tamraykuhina riqsisqa kanku. Chay apukunam Pachakamaqpa unanchasqan kaspa hichpan suyukunata qawarispanku kawsayninta yanapanku.Chaymi runakunaqa kuyakuymanta sapa kuti haywarikuyninkuta churakuspa anqusanku. Kuraq apukunaqa sapakama rurayniyuq atiyniyuqmi. Chaytam ayllu runakuna yachaspa atiyninmanhina imatapas mañakunku, hinaspa munasqallankuta churapunkupas.

Kuraq apunkuna kaypiqa tarikunku:Rasu Willka, kayqa awqanakuypaq walla

apum, Waman Rasu, kayqa awqanakuqpa kamachikuqpa qayllanpi amachaq apum, Qarwarasu,kayqa pachapa qukusqan chikikunamanta waqaychaq apum. Apachita/Raqra kayqa yaku pusaq waqaychaq apum. Kay tawankum kuraq ayllu apukuna, paykunam ñawpaqa ritikunata uywarqaku.Paykunataqmi quchakunaman yaku aypuqkuna karqaku, runakunapa ancha yupaychananku kanku. Anqarakunaqa hawa suyukunapi kaq apukunatapas yupaychakuywanmi qawariqku, kanmi Paryaqaqa, Wallallu Qarwinchu, Pachakamaq, Waytapallana, hukkunapas kantaq.


30